Henrietta Green (Hetty Green) dünyanın
ən varlı qadını (1916) və dəhşətli dərəcədə pinti olması ilə məşhurlaşmışdır. Hətta
pintiliyinə görə Ginnesin rekordlar kitabına düşmüşdür. Wall
Street`də kifayət qədər təsiretmə gücünə sahib olan ilk amerikalı qadın
olmuşdur.
Hetty Green 1835-ci ildə anadan
olub. Valideynlərinin iri şirkət sahibləri olması və işə daha çox vaxt sərf etmələri
səbəbilə babasının yanında böyüyüb. 6 yaşından başlayaraq maliyyə qəzetləri oxumuş
və artıq 13 yaşında ailə şirkətində mühasib kimi çalışırmış. Ailəsindən ona
təqribən 7.5 mln. dollar miras qalmışdır.
Hetty Green`in pintiliyi haqqında
bir çox hekayətlər vardır. Belə ki, deyilənlərə görə o, heç vaxt qızdırıcını
yandırmır və isti sudan istifadə etmirmiş. Yeganə köhnə, qara donununu geyinər,
alt paltarını isə yalnız tamamilə sıradan
çıxanda dəyişirmiş. Əllərini yumur, ən ucuz restoranlarda nahar edir və daha
çox 15 sentə olan piroqları seçərmiş. Hətta, o bir dəfə bütün günü
itirdiyi 2 sentlik markanı axtarmağa sərf edibmiş. O, pula və sabuna qənaət
etmək üçün paltarları yumdurtmağa verəndə onların yalnız ən çirkli hissələri
yumağı tapşırarmış. Daha ucuz olduğuna görə qırıq peçenyeləri və öz sevimli iti
Devi üçün pulsuz sümük almağa yerli dükana gedərmiş. Bir çoxları deyirdi ki, o yalnız ofisdə
qızdırıcının üstündə hazırladığı yulaf yarması yeyirmiş. Ən dəhşətli hadisə isə
onun oğlu Nedin ayağının sınması olmuşdur. Belə ki, Hetty həkimə pul verməmək
üçün yoxsullar üçün olan xəstəxanaya müraciət etmiş və nəticədə uşağın ayağını
amputasiya etmək məcburiyyətində qalmışlar və o, protez ayaq sahibinə
çevrilmişdir.
Biznes
həyatında olan qəddar mübarizliyinə, bəlkədə daima süzülmüş, formasını itirmiş,
köhnə paltarlar geydiyinə görə ona “Wall Street`dən olan ifritə” adını
vermişlər. Bu qadın dəhşətli biri olmasına baxmayaraq, kifayət qədər işgüzar
biri olub, daşınmaz əmlak, ivestisiya qoyuluşu ilə məşğul idi. Hətta 1907-ci il iqtisadi böhranı zamanı
Nyu-York şəhər idarəsi ona kredit üçün müraciət etmişdir. Hər dollarına görə narahat olan Hetty ailə
həyatı qurduğu multimillioner Edvard Green`i özünün mülkiyyəti və sahib olduğu
pulu üzərində olan bütün hüquqlardan
imtina etməyə məcbur etmişdir.
Hetty 80 yaşında ürək tutmasından ölmüşdür. Ölümündən
sonra onun sərvəti 100—200 mln.
dollar həcmində qiymətləndirilmişdir.
